Antonio Corredera
Poesias xalimegas nu carregu
1. Haikus
U primel beixu.
Me corri um furmiguilhu
pur a barriga.
Mei corazõ.
Sendu golosu pidi:
bombõ, bombõ.
U valverdeiru
é filhu xalimegu,
cum dois hermanus.
Carregu levu
nas costas, cua facenda
de xalimegas
As xalimegas
sõ palavras raianas
dus tres lugaris.
Us tres lugaris
que falam xalimegu,
que nõ chapurrau.
U valverdeiru,
lagarteiru i manhegu;
falantis, sõ tres.
2. ¡VIVA SÃ BRAS!
¡Viva Sã Bras
cua gorra pa atrás!
Pa quem corri,
pa quem mira.
Pa quem vinhu,
pa quem nõ.
Pa quem canta,
pa quem cala.
Pa quem visti de saias de picau,
pa quem nõ.
Pa quem baila,
pa quem nõ.
Pa quem bebi, pa quem comi,
pa quem nõ, pa quem nõ.
Pa quem fotus a pelu eita,
pa quem as eita cum u flash.
¡Cua gorra pa atrás,
Viva Sã Bras!
3. As froris das jaras
U sé a cencia certa,
estoi seguru porque elas contáram mo.
Tos us anus, as estrelas celebram a festa da partia.
Sí, huvu ũa ve que a Terra viviu na pracenta da Madri de to u cunhociu i pur sabel.
Era parti da essencia da Na, de ondi to provem.
Según se diva gestandu na profunda matri sim media,
sonhava cum sel em busca dus brazus du sei amau Espaciu, que agora a acuna.
Inda nõ se mediam as coisas que pasavam cua vara du tempu,
cuandu apareceram us doloris du partu.
Naquel se oiviu um grã ruiu jamás escutau.
Ũa palmeira de fogus expandiu tantas, as suas ramas,
que nõ temus númerus pa contalas.
Eram brínquilis de Lu que buscavam um puntu inmaterial ondi engarzal-si.
Asina naceram as estrelas,
pero estavam solas i pidiram a sua Madri ũa hermana.
Foi entoncis, cuandu ú úteru inda nõ se havia replegau, seiu ela.
Era comu u capulhu de ũa rosa colorá que colgava de um cordõ brancu retorciu.
Nu caminhu em busca du sei amau, que agora a tem nus seis brazus; du cordõ se desprendeu,
i a Madri, que to recicla, u cordõ trocó em Luna du alumbramentu,
pa que a Terra tuvera um espelhu ondi miral-si.
Según perdia u encarnau colol das forzas eitás nu partu,
foi tornandu u sei corpu em azul turquesa,
i se diva alejandu das suas hermanas maioris, mentras se cenhia pa sempris
a forza orbital de sei Padri.
As estrelas entristeceram, deixaram de xugal au redol da Luna pur u dia
i pensaram que tinham que rememoral aquel tempu em que tuveram cerca a Gaia.
Dizim as fontis esotéricas, marcás nus barrocus da serra du nossu lugal,
que tos us anus, ũa noiti de abril, as estrelas danzam nu ceu u baili da despedia,
nu que ca ũa vai ficendu um retratu sei de cincu pétalus,
em ca um dus que derrama ũa lágrima de sangri em prenda du sei dolol pur a partia.
Acabá a festa, deixam quel u sei regalu au sideral abismu,
pa que chegui au regazu desta pequena hermana sua que habitamus.
Pur a minhã, cuandu u olhu du Cíclopi se desperta
levantandu a sua cegadora i cálida mirá pur cima das crestas que mus guardam,
vemus u nossu campu sembrau cum u presenti que mus enviaram as estrelas,
que nos chamamus a frol da jara.
